வழக்கம்போல் அந்த டவுன் பஸ்ஸில் இன்றும் கூட்டம் நிரம்பிவழிந்தது,ஆனாலும் அருண் ஜன்னலோர இருக்கையை பிடிச்சு உட்கார்ந்துட்டான்.
பஸ் புறநகர் பகுதியில் வந்துகொண்டிருந்தபோதே அவனால் உட்காரமுடியவில்லை,இன்னும் இருபத்தைந்து கிலோ மீட்டர் போகணும்னு நெனச்சாலே எரிச்சலாக வந்தது.சைக்கிளில் போறவங்க கூட சைடு வாங்கி போற அளவுக்குதான் இருந்தது பஸ்ஸின் வேகம்.இந்த வேகத்திலேயே போயிட்டிருந்தா இன்னும் ஒரு மணி நேரம் ஆகும் ஊர் போய்ச்சேர.இதுல அஞ்சு நிமிஷத்துக்கு ஒரு நிறுத்தம் வேற.
கோடைகாலம்கிறதால ஒரே புழுக்கம்,அநேக பயணிகள் வேர்வையில் தெப்பமாக நனைந்திருந்தனர். மேற்கொண்டு கூட்டம் கூடிக்கொண்டே இருக்குதேத் தவிர, ஒருத்தரும் இறங்குற மாதிரி தெரியல.
அருண் அமர்ந்திருந்த இருக்கை, சரியாக டயருக்கு மேலாக வரும் இருக்கையாதலால் அவனால் வசதியாக உட்காரமுடியவில்லை,எழுந்து நிற்கலாமென்றால்,"கூட்டத்தில் நசுங்குவதைவிட, இதே மேல்" என்றெண்ணி அப்படியே உட்கார்ந்து பார்வையை வெளியே ஓடவிட்டான்.அதிலும் சிரமம் ,அவன் உயரத்திற்கும்,ஜன்னலின் உயரத்திற்கும் ஏழாம் பொருத்தமாக இருந்தது. ரூட் பஸ்ஸில் வந்திருந்தாலாவது பாட்டு கேட்டுகிட்டே வந்திருக்கலாம், இப்போ அதுக்கும் வழி இல்லையென்று நினைத்துக் கொண்டான்.
"டிக்கெட்,டிக்கெட்"என்றபடி நடத்துனர் கூட்டத்தில் நீச்சலடித்துக் கொண்டிருந்தார்.அவரைப் பார்த்த போது, இவனோட சிரமம் கொஞ்சம் பரவாயில்லேன்னு தோணுச்சு.
இருக்கையின் உஷ்ணம் தாங்காமல் லேசாக எழுந்து மீண்டும் அமர்ந்து கொண்டான்,அதற்குள் அவன் எழப்போவதாக எண்ணிய இருவர், ஒருவரை ஒருவர் தள்ளிக்கொண்டு இடம் பிடிக்க எத்தணித்து அசடு வழிந்தனர்.
பக்கத்தில உட்கார்ந்திருந்தவர் ஒரு பிரபல வார இதழை படித்துக் கொண்டிருந்தார், மெதுவாக அதில் கவனத்தை செலுத்தினான். தனக்குப் பிடித்த நடிகரின் பேட்டி அதில் வெளியாகியிருந்தது,ரொம்ப சுவராஸ்யமாக படிக்க ஆரம்பித்தான்,ஒரு ரெண்டு பத்தி படிக்கிறதுக்குள்ள அவர் அடுத்த பக்கத்துக்கு திருப்பிவிட்டார்.அந்த நடிகரையும்,பிரபல நடிகையையும் இணைத்து வெளிவரும் கிசு கிசு பற்றிய கேள்விக்கு, அவர் சொல்லியிருந்த பதிலை படிக்கும் போதுதானா இப்படி திருப்ப வேண்டும்.
இப்போ அவனுக்கு, பஸ்ஸின் வேகம்,வேர்வை,இருக்கையின் சிரமம் எதுவுமே சிந்தனையில் இல்லை,யோசனை முழுக்க அந்த நடிகரின் பதில் என்னவாக இருக்கும் என்பதிலேயே இருந்தது.
அடுத்தடுத்த பக்கங்களை புரட்ட அதிலும் சினிமா சம்பந்தமான செய்திகளே இருக்க,அவர் அருணிடம்,"எந்த புத்தகத்த பார்த்தாலும் இந்த சினிமாக்காரணுங்கள பத்திதான் எழுதுறானுங்க" என்றதற்கு மெலிதாக சிரித்து வைத்தான்.மனசுக்குள் "சீக்கிரம் படிச்சு முடிய்யா" என்று சொல்லிக்கோண்டான்.
அடுத்தடுத்து சில அரசியல் செய்திகளை பார்த்துக் கொண்டு வந்தார், இவனும் ஓரக்கண்ணாலேயே வேகமாக படித்துக்கொண்டிருந்தான்.சில பக்கங்களை அவர் படிக்கும் வேகம் இவனோட பொறுமையை சோதிக்கிற மாதிரி இருந்தது.
பஸ் இப்போ கிட்டதட்ட பாதி தூரம் கடந்திருந்தது,கூட்டமும் கொஞ்சம் கொஞ்சமா குறைய ஆரம்பித்திருந்தது.இன்னும் ஒரு சில நிறுத்தம்தான் மீதம்.அதை நினைத்து கொஞ்சம் ஆசுவாசப்படுத்திக் கொண்டான்.
அருண் எப்போவோ படிச்சு முடிச்ச பக்கத்தை, இப்போதான் அவர் படிச்சு முடிச்சு அடுத்த பக்கத்தை புரட்டினார், மீண்டும் ஜோதியில் ஐக்கியமாகி படிக்க ஆரம்பித்தான். புதிதாய் கட்சி ஆரம்பித்திருக்கிற ஒரு நடிகரின் பேட்டி அடுத்ததாக இருந்தது.
"இனிமேல் நடிகரெல்லாம் கட்சி ஆரம்பிக்கக் கூடாதுன்னு சட்டம் கொண்டுவரணும்" என்று ரொம்பவே ஆவேசமா அருணைப் பார்த்து சொன்னார்.
இவனும் கண்ணை புத்தகத்தில் பதித்துக் கொண்டே,"ஆமாம்" என்பதாய் தலையாட்டினான்.
அருகில் நின்று கொண்டிருந்த ஒருத்தரும், நடிகர்கள் கட்சி ஆரம்பிக்கிறதுக்கு எதிரா பேச ஆரம்பித்தார்,உடனே அருணிண் பக்கத்து இருக்கைகாரரும், படித்துக் கொண்டிருந்த பக்கத்தில் அடையாளத்திற்கு விரலை வைத்துக்கொண்டு, புத்தகத்தை மூடிய படியே சுவராஸ்யமா அவருடன் பேச ஆரம்பித்துவிட்டார்.
அதற்குள் இந்த விஷயத்துக்கு ஆதரவாகவும்,எதிராகவும் வாக்குவாதம் மிக சூடாக இன்னும் சிலரால் தொடரப்பட்டது.பேச்சின் இடையே புத்தகத்தை திறப்பதுபோல் வருவார், மீண்டும் பேச்சிலேயே மூழ்கிவிடுவார். இவனுக்கோ சரியான எரிச்சலாக இருந்தது.
"யோவ்,ஒன்னு படி , இல்ல பேசு" என்று மனதிற்குள் நினைத்துக்கொண்டான்.
அடுத்த நிறுத்தத்தில் அருண் இறங்க வேண்டும்,அதற்கு தயாராகி கொண்டிருந்தபொழுது மீண்டும் வாசிக்க தொடங்கினார்,இவனும் நிறுத்தம் வருகிறதாவென பார்த்துக் கொண்டே விட்ட இடத்திலிருந்து தொடர்ந்து படிக்க ஆரம்பித்தான்.அதற்குள் நிறுத்தம் மிக நெருங்கிவிட எழுந்துகொண்டான்.
"என்ன தம்பி இறங்க போறீங்களா?"என்றார் பக்கத்து இருக்கைக்காரர்.
"ஆமாம்"என்றான்.
"அப்படியா,ரொம்ப நன்றி தம்பி" என்றபடியே அருண் இடம் பிடிக்க போட்டுவைத்திருந்த, அந்த வார இதழை அவனிடம் கொடுத்தார்.
தன் நேரத்தை நொந்தபடியே புத்தகத்தை வாங்கிக்கொண்டு இறங்கினான் அருண்.
